【on.cc东网专讯】 2013年港姐冠军陈凯琳堪称「白富美」表表者，身为千金小姐的她，恋爱经验少之又少，她说过拍拖要小心了解相处兼讲Timing，才能扑槌认证为男友，又自爆几乎冇拍过拖，以往最多只约会睇戏食饭，试过出两三次街就拖手，但之后冇Feel未有继续发展，她亦曾透露过往拍拖都不超过两个月。和46岁的郑嘉颖于今年初合演新剧《殭》邂逅，经过了解后终认拍拖，郑嘉颖明显「考核」成功兼「试用期」合格，顺利过渡，拍拖至今已逾大半年进入「安全期」。
陈凯琳认为拍拖的目的就是想有将来，目标明确，故获父母支持：「佢的知我唔会随便拍拖，真系Make Sure对方同我相处得好好先会发展。我好认真，拍拖系想有天长地久，否则点解要拍拖？」
虽然希望将来生小朋友，但体贴的陈凯琳明言会尊重男友的意愿。
生BB 有商有量
郑嘉颖曾讚陈凯琳全冇千金小姐的气燄，反而懂得体谅别人，难能可贵。陈凯琳的确是「任你Say」女友，凡事有商有量，难怪和郑嘉颖年龄相距22年也不成问题，源于她抱着「爱是不保留」的态度，即使对方的缺点，也照单全收。「所有野都讲Timing，搵一个夹到、所有野都有倾有讲嘅人就OK！无论系无聊倾偈定系讲正经野，佢都畀到意见你，而且唔可以话锺意佢嘅边一面，人愈大，我觉得对方所有野都要锺意，Even佢嘅缺憾！除非嗰个缺憾好影响双方关系，否则要好全面咁爱对方！」陈凯琳的有商有量，远及将来生儿育女。「我好锺意小朋友，但依家好多人都唔生，我好尊重各方意见，所以要了解男方意愿，Even我想要但佢唔想嘅，咁大家一定要倾。」
陈凯琳说跟圈中人拍拖的好处，就是理解对方的工作，又撑郑嘉颖不是爱周围撩女仔的花弗男。她又自言很「宅」，需要个人空间，故不是一个贴身膏药的女友，但同时又会花心思製造惊喜：「最紧要够细心同诚意！例如行行吓街讲左句：『我好想去新加坡食榴槤。』无啦啦有一日佢真系搵嚟畀你食，呢啲小惊喜比名贵野嚟得更开心！」陈凯琳今年的24岁生日，因工作关系要在法国度过，郑嘉颖便特意飞往当地给她惊喜庆祝，正中红心！
陈凯琳大讚郑嘉颖有心思，久不久会送上神秘惊喜。
陈凯琳坦言爱一个人就要接受埋对方的缺憾。
婚纱相一定要多
陈凯琳追求细水长流的爱情，眼见今年踏入结婚三十周年的父母感情仍然甜蜜，令她对婚姻充满憧景。有时为工作而穿婚纱，总会触动其恨嫁的心：「着婚纱上身，就会谂自己究竟几时结婚，又谂要拣一条点样嘅婚纱，好似拣极都拣唔完！可能到正式嗰日会拣到，但系影婚纱相真系要影好多条！」梦想的婚礼？已经想好了！她说：「锺意静嘅地方，可能喺森林入面，有啲灯笼有张白色长枱，好靓好简单。成班朋友同屋企人一齐食饭倾偈，我同老公就坐主席位！」
自言很「宅」的陈凯琳强调需要个人空间，所以绝不会成为贴身膏药般的女友。
贵为「白富美」代表的陈凯琳原来择偶条件非常简单，就系要大家夹得埋及岩倾。
全靠男友点醒
陈凯琳和父母感情要好，工作忙碌令她与家人见面时间随之减少，因此她每次出席活动都会当成「毕业礼」，要父母亲身「见证」。「爹的会帮我影好多相，妈咪就喺台下面望上嚟，见到佢个表情好Proud of个女，好似毕业礼咁！我当年因为返嚟选港姐冇行毕业礼，所以依家会叫佢的嚟睇，畀佢的知个女做紧乜，令佢的安心！」由前年参选港姐入行开始，面对被质疑整容、家底被揭等，她坦言对家人感抱歉：「我喺外国长大，冇谂过香港传媒点运作，影响到佢的我会唔开心。父母成日担心我、问我有冇事，对我好大安慰！」
陈凯琳拍拖的目标明确，就是要结婚。
唔讲唔知，原来陈凯琳参选港姐全因觉得郭羡妮港姐时画面好震撼，陈凯琳仲大讚郭羡妮系好勤力嘅演员。
选美皆因郭羡妮
参选港姐是童年梦想，陈凯琳直言1999年港姐冠军郭羡妮是她参选的「主因」：「8岁睇港姐嗰阵觉得佢好震撼好靓，决定参选系唔想后悔！我知自己同佢之间有好多相似位，佢令我好有动力去选，系我好Admire嘅师姐，除左美貌与智慧并重，佢系好勤力嘅演员，依家亦系个好妈妈。」
热爱演戏的陈凯琳又表示视田蕊妮为目标：「阿田喺《巨轮》真系做得好放，要做到咁先成功！同佢合作《巨轮2》算系圆梦，就算唔系拍自己场口，我都会去偷师睇佢点做，唔使以前咁静静鸡去睇，可以堂堂正正咁企喺度！《巨轮2》入面我系一个好大胆嘅女仔，有好大发挥空间。第一次睇剧本会用First Impression去谂个角色应该点做，好似个角色要跳海，第一次睇就系『跳就跳啦』，睇第二次会谂点跳可以同其他人唔同，令个角色变得好『自己』！」
陈凯琳大讚男友于工作上帮助她不少。
郑嘉颖与陈凯琳今年初合演新剧《殭》而挞着。
拍喊戏开窍
咁，郑嘉颖呢？陈凯琳即细说之前与男友拍剧的「开窍」事件：「有一场系同郑嘉颖拍，讲我为佢牺牲左好多，去佢舖头前面大嗌，佢点都唔肯出嚟，之后我崩溃丧喊，但当时太紧张完全喊唔出！嗰场嘉颖未埋位，佢知我做得唔理想特登嚟睇，行埋嚟叫我清清楚楚咁谂场戏讲羊，而唔好靠其他野去帮我，唔系幻想朋友、家人入院呢啲。嗰刻立即明晒，再拍嗰阵喊到收唔到声咁滞！」
今年四月《好报》独家踢爆陈凯琳到郑嘉颖屋企短聚。
今年6月二人在金钟扒房撑枱脚。
