■滿腹大計的姜皓文，透露將做導演，拍一個關心社會的故事。
姜皓文憑電影《翠絲》中的跨性別角色，首次獲提名香港電影金像獎最佳男主角，於今屆金像獎硬撼4位影帝級人馬黃秋生、周潤發、吳鎮宇及郭富城。回憶起獲提名影帝一刻，黑仔忽然心情激動，淚灑人前。
與周潤發爭獎不可思議
「每個演員獲提名，信心一定大，我自己就有百分百信心。話雖咁講，但我覺得如坊間所講，今年影帝競爭是史上最強。對手是誰？周潤發喎，幾耐沒聽過金像獎提名名單有周潤發，仲有姜皓文有份，係咪不可思議先。秋生、鎮宇全是殿堂級影帝，我只是一個ＢＢ班。經過上次金馬獎，都知道入圍男主角不簡單，一班評審真係睇戲，去評論一部戲做得好同唔好，能入圍真係好感恩，一班同業的肯定。記得知道入圍一刻，我人在內地拍戲中，我本身沒打算睇名單，怕太太及同事失望。當日諗住開工度過，唔使睇電話，點知導演話早收工，我咪侷住返酒店睇電話等公佈，自己唔想話畀太太聽，怕佢會失望，最後都忍唔住開咗電話睇，打埋電話畀老婆，同老婆講金像獎今日公佈，剛打開電話就聽到古天樂宣佈最佳男主角（候選名單），我仲放喺最尾𠻹，好緊張，聽到後自己反應好混亂，我喺酒店張床打咗兩個筋斗，都幾開心，係一件不可思議的事，現在講起都驚。」
放下包袱接拍《翠絲》
在《翠絲》中，黑仔演的佟大雄年輕時在父母安排下結婚，跟思想守舊的太太（惠英紅飾），維持了一段幾十年的婚姻。因為好友離世加上重遇一位故友，令他重新面對自己，將收藏心深處的秘密公開，決定要變性。其實在同導演接觸初期，黑仔是拒接的，因為自己對跨性別人士一無所知，後來在導演及老闆游說下，放下以往包袱接拍。
「姜皓文以往畀人的感覺，就是經常飾演雄赳赳的角色。這個角色最難是如何拿捏女性心靈上的嫵媚，當初聽完這個故事，我都考慮了很久，因為這個故事題材獨特，我對跨性別人士和同性戀者完全沒有認識，只是以前讀寄宿學校時有一個高年級同學，他自小就覺得自己應該是女性，同學間當時經常笑他欺負他，畢業後有次在地鐵站，見到他已變成很開心的女仔。《翠絲》開戲前，我和導演的跨性別朋友傾談，他們真的很普通，甚至朋友間會互相取笑，生活得很開心，但在我們眼中，每個故事都幾酸。我有問過自己，如果我是男主角的家人，會否接受到呢？人始終有口話人，冇口話自己，可能我都會一樣，要被人話完，之後反省完才會改。」
多謝太太陪伴走過低谷
近年不少寫實的電影如《幸運是我》、《一念無明》，甚至乎今年的《淪落人》，都是以寫實的社會現象為背景。金像獎的成績要本周日才揭曉，黑仔已經將今次提名金像獎確立為里程碑，他又首次透露在打磨劇本，希望可以做導演，拍一個自編、自導的電影。
「自己入行30多年，身邊好多朋友都轉了行。大概在2002、2003年左右，試過兩年沒有工作，幾乎要轉行，有一段時間嘗試去經營私房菜，因為我自己很喜歡入廚，也有一班做廚師的朋友，既然沒有工作，便自己找出路，當賺錢也好，給地方自己休息也好，經營過兩年私房菜。後來個心始終想拍戲，有一個前輩跟我說『你要堅持啊！可以放下一會兒，但千萬不要離開，離開便完了。哪怕你工作辛苦，至少仍然存在......』別忘初心，方得始終。從視圈走入影壇，好多謝我太太殷寧陪伴我走過高山低谷，現在我完成工作，最開心就是回家陪老婆同『囝囡』，即是我的狗狗。最近我着手搞緊個劇本，關於香港一群被人忽視的人。劇本已經成型，再同公司傾傾，希望今年可以開拍，自己做導演，我經常希望香港電影有社會意義。」
