大台剧集《张保仔》继续热播中，虽然剧力不足派胶频频，不过凭呢位著名历史人物嘅号召力，都足以令唔少家庭观众晚晚乖乖收看。其实当年张保仔横行南中国海，就系以我的身处嘅香港为根据地，所以香港处处都会见到佢嘅足迹。虽然有啲系传说，有啲只系用佢嚟命名，不过唔紧要，《新地网》现在为你一一介绍，等大家有时间都可以去到香港唔同地方，同保仔神交一番！
长州张保仔洞
冇办法，要讲张保仔喺香港留下嘅印记，大家脑海中即刻浮现嘅答案只会有一个，就系「张保仔洞」！
张保仔洞位于长洲西南部，相传系张保仔当年收藏宝物嘅地方，多年来已经成为长洲嘅名胜。其洞口甚窄，只够一人通过。洞内漆黑一片，而且凹凸不平，所以入洞者都系带备电筒比较好。幸好近年已经摆放左一条金属梯，方便游客上落。但最后都要讲句，张保仔洞其实相当狭窄，难以收藏宝物，所以应该都系传说居多。不过参观一下亦无妨！
春坎角张保仔洞
其实香港有唔少近海嘅岩洞都盛传系同张保仔有关，除左最出名嘅长洲张保仔洞，港岛南区春坎角亦有一个！
洞位于春坎角公园附近、春磡角炮台遗址下面嘅海崖。接近海面位置有一处隐蔽岩洞，更有传本来洞内有一条秘道可以通往赤柱湾嘅北帝庙，不过张保仔向清廷投诚后，通道就被清廷所封。要注意嘅系春坎角张保仔洞位置险峻，必须手足并用攀爬巨岩方可到达，冇攀岩经验嘅人士千万要量力而为，免生意外！
张保仔古道
据称张保仔同佢嘅党羽经常喺附近流连往来，成日用到呢一段小路，所以就被称为「张保仔古道」。张保仔古道位于香港岛太平山山腰，先去到半山花园道再上香雪道，见到旧山顶道和地利根德里嘅交界就系入口。沿途花木繁茂，景色宜人，而且比较少人去，不失为一个散步好去处。
所谓古道其实只系一条小径，不过有崎岖亦有平坦，需要跨过山涧、穿越丛林，仲有啲位要徒手攀爬石壁，全程大约要40分钟。但亦要注意安全，因多年前有行山人士进入张保仔古道时跨岩而行，结果无法走回头，于是除衫挥衣求救，好彩有林外高楼大厦嘅居民见到之后报警，最后先得救。
太平山
太平山又关张保仔事？因为百几年前，香港岛一带都系海盗嘅巢穴，所以曾有「贼巢岛」呢个别名。而呢座高峰位于港岛西南部，相传张保仔喺山上设有瞭望台，如果见到可以落手嘅船隻，就会以升旗为号，通知山下嘅兄弟做野！所以久而久之，呢座山就被称为「扯旗山」。但后来包括张保仔在内嘅各派海盗都接受清廷招安，香港嘅海盗集团自此没落，自然就冇人再喺山上「扯旗」。既然唔再有海盗肆虐，附近一带都变得安静了、太平了，所以就直到依家我的都系称呼呢座山为「太平山」。
不过喺今日商店林立嘅太平山顶，相信都难以感受到半分古时嘅味道，所以不如上凌霄阁，望吓当年海盗喺山顶等「扯旗」时见到嘅景致。
张保仔号
张保仔嘅船都仲有得坐？当然唔系同安船，讲紧嘅系「张保仔号」！相信大家坐渡海小轮嘅时候，都会留意到维港海面有一艘古色古香嘅红帆船，其实佢系属于一个知名餐饮集团，为客人提供海上旅程。
张保仔号怀旧嘅外形下有新潮嘅室内设计，有开扬舒适嘅雅座，窗旁更有可供半躺嘅宽阔沙发，等游客可以尽情relax，一边吹海风一边享受特式饮品。客人可以喺船上欣赏「幻彩咏香江」，甚至游览赤柱。虽然同张保仔无甚关连，不过喺坐住一架咁有特色嘅船，乘风破浪一下，或者都可以体会到古人扬帆出海嘅感觉…虽然价钱绝对唔便宜。
张保仔馆
「张保仔馆」位于长洲海旁街33号地下，系一间以张保仔为特色嘅主题餐厅，楼高两层，穿过一个仿似山洞嘅入口后就会见到亦中亦西、挂住红灯笼以及清朝官服嘅大厅。除左装潢骨子，餐牌亦有gimmick，如「张保仔旗舰」即系雪糕香蕉船、「招安成功杯」即系朱古力雪糕杯等，味道中规中矩，不过胜在过瘾。
除左提供餐饮服务，二楼亦有五间客房可供住宿。另外话明张保仔馆当然唔系得个样咁hea，馆嘅天台附设张保仔资料展览馆，让游人认识历史，了解长州嘅独特文化。
全文完
部份为网络图片
