鄭伊健、蘇麗珊及馮允謙昨日到尖沙咀出席蝙蝠俠80周年活動，三人除與「蝙蝠俠」擺出型格甫士影相外，又跟現場觀眾大玩遊戲，馮允謙並即場自彈自唱。伊健透露自小想成為英雄人物，又謂每個人都應該有夢想並要堅持，他以自身作例子，指當年入行遇到阻攔，聽過難聽說話，但他仍堅持做好自己。
■伊健自小就想成為英雄人物。
伊健表示小時候已睇蝙蝠俠，並想成為英雄人物：「自小想成為英雄人物，咁拍戲都做過（聶風）。（細個有冇扮過蝙蝠俠？）有份扮過超人，同阿哥扮超人打怪獸撞埋架衣車度，膝頭成忽肉冇咗，不過呢個都係夢想嚟，人係需要夢想。」他謂每個人都應該有夢想，而夢想是要時間和努力去實踐：「其間可能會遇到困難、阻攔，但要堅持，例如我當日做藝人，都被人話『你得唔得㗎？』，會唔贊成或講唔好聽嘅說話。（被人話得最唔開心係咩說話？）唔記得啦，太多，例如做聶風，啲人就話我唔得，我冇諗過自己會夢想成真，但會做好自己嘅嘢。」
近日忙於為巡唱鍛煉的伊健，表示會做到十月，希望之前拍動作片的後遺症可以恢復，而之前手部的傷勢亦已康復得七七八八，不用再做治療。至於電影方面，他透露原本有電影，但因為題材問題，所以要挑選好的才拍。
蘇麗珊積極進修學戲
馮允謙表示自小的夢想就是唱歌，如今雖夢想成真，但因本身母語是英文，唱廣東歌有難度，回港後都要學講廣東話：「之前都有搵老師學中文，有時講嘢會『??』，一緊張啲英文口音就會出晒嚟，所以學緊慢慢轉channel。」他又透露有睇港產片學廣東話，周星馳的電影更睇晒。
對於伊健追尋夢想期間遇到阻攔及聽到難聽的說話，問蘇麗珊可有遇過類似的事？她謂因本身不是讀演藝出身，就算別人不講，也覺得自己有很多不足之處，所以好想進修，夢想是做個好演員，想跟秋生哥學演戲，但對方很忙，不過她現時也有跟甄詠蓓學戲，之前剛上完一個課程，下半年應該都會再上。
