本来陈国邦罗敏庄（Mimi）夫妇一同喺TVB工作，不过自前年9月Mimi生完B坐紧月，但被TVB叫返去「还骚」上节目《今日VIP》同《都市閒情》，而拍剧嘅机会又愈来愈少，于是佢毅然不续约TVB。
而老公陈国邦喺噚日于微博写左封公开信，表示决定离开工作左廿年嘅TVB。虽然陈国邦以千字文写左一篇感言，但就未有向TVB发炮，只系慨叹自己工作咁多年都苦无机会，做足二十年配角。于多部剧集都深受好评嘅陈国邦，喺2012年凭《大太监》夺最佳男配角嘅呼声相当高，可惜最后输左畀另一热门古明华。
不过陈国邦亦都无因为演出出色而得到更多机会，所以就决定离开，佢表示：「我不想看见自己慢慢的变作一潭死水，发黑发臭。实在不能接受。我要流动，我要充满生命。只有我充满生命力，我的作品才能充满生命的去感动人、甚或改变人。」唔甘心做配角嘅陈国邦表示，离开之后未知去边，但就好乐观咁话:「反正有需要我的地方，有我落脚的地方，我便会到那裡。」
老婆Mimi接受访问时就话非常支持老公决定﹕「佢都有返嚟同我倾，都系呢排决定，我都觉得佢唔系咁开心，咁不如唔好做萝，无所谓，佢又做舞台剧，又可以教书或者其他野。一份工作如果做得唔开心，而你岁数去到某个阶段，剩下嚟日子唔系好多，咁与其唔开心，不如去做另外一啲野啦。」
Mimi提到陈国邦每年暑期都会返母校演艺学院教书，每次做舞台剧《相约星期二》都好开心。被问到会否认为老公怀才不遇，佢就表示：「呢个唔系我觉得，系身边啲人话畀我听，但我不嬲系佢头号fans，fans到嫁左畀佢勒。」亦有人指陈国邦唔识做人，Mimi就话﹕「我谂佢......唔知呢，究竟点先叫识做人？咁要有人话畀我知点样先叫识做人嘛，不嬲都无乜野，你知佢不嬲唔出声，佢发洩都唔系走出嚟大吵大闹，文艺到写封信畀大家，你睇佢几文艺『中青年』。」
而黎耀祥听到好友要离开TVB就表示：「佢嘅心情我好明白，十几年前我离开无綫时都有呢种心情，系突破唔到，不过我唔担心佢，佢系一个好有才华嘅人，话唔定将来几年后好似我咁，有个新睇法再返嚟拍剧。」早年祥仔同陈国邦一样，都认为自己苦无机会，于是决定勇闯影圈，期间佢获益良多，回巢TVB后就深受重用，仲拎过三次视帝。希望陈国邦都可以好似祥仔一样，外闯之后得到成功同认同啦！
