王维德呢个名你未必识，但系一讲东华「卡拉之星」你就一定谂起佢。王维德已经喺大台做左超过二十年，做到变中佬都仲系冇羊人识嘅佢，原来最近都正式同大台结束宾主关系，心淡离巢发展。据知，佢转签一间製作公司，明年初更会举行演唱会同接拍电影。
 
    噚日王维德到电台接受访问，佢坦言喺大台做到心淡，指大台嘅机会唔多，每年有份试镜或演出都可能系得两套剧左右，佢谓：「其实喺公司有戏拍已经好开心，但发展机会唔大，不如出去外面试下，或者将来有机会再返嚟。」
 


 
    王维德1986年投考无綫艺员训练班后入行，同郭政鸿和林韦辰系同期同学，不过佢嘅发展就唔多顺利，除左每年都做东华卡拉之星台柱之一外，佢仲会表演手语歌。佢喺访问中表示嗰几分钟演出，系佢每年最有满足感同开心时候，因为可以自己策划一个表演，好有满足感，而佢亦好多谢上年薛家燕同王祖蓝搵佢做扮野节目，「天堂老鸟」亦系佢近年最开心嘅演出。
 
    佢又觉得唔少新人机会比自己多：「有时都反省自己，我演戏、外形同条件，有啲角色要做手语，公司都系叫我帮手，但系嗰个年龄层系岩我，都会有唔开心。」又承认做到有心灰意冷同怀才不遇感觉。原来佢早前曾经去过马来西亚发展，拍过一、两套剧，当地製作单位有意签佢，但佢又想返嚟大台再闯，放弃机会，不过到今日佢就决定要离巢外闯。